شوہر یا بیوی جرمنی میں = کیا ان کے ساتھ ملنے کا حق ہے؟

نہیں۔ جو بھی جرمنی میں اپنے شریک حیات سے ملنے کا خواہشمند ہے پہلے اسے چند شرائط کا پورا کرنا لازمی ہے۔

اس سلسلہ میں پہلا قدم کنبہ کے اتحاد نو کے لئے ویزے کی درخواست دینا ہے۔ یہ ویزا حاصل کرنے کے لئے میاں بیوی کو قانونی طور سے عمل میں لائی گئی شادی کا ثبوت دینا ہوگا اور یہ بھی باور کرانا ہوگا کہ دونوں جرمنی میں ایک ساتھ رہنے کا ارادہ رکھتے ہیں۔ ضروری ہے کہ میاں بیوی دونوں اکثریت کو پہنچ چکے ہوں۔ مزید یہ کہ میاں بیوی کو یہ ثابت کرنا ہوگا کہ وہ اپنا خرچ سنبھال سکتے ہیں۔ اس کا مطلب یہ ہے کہ دونوں روزمرہ کے خرچ اور صحت بیمہ کے اخراجات بغیر حکومت کی مدد کے اٹھا سکتے ہوں۔ انہیں یہ بھی دکھانا لازمی ہے کہ جرمنی میں جس اپارٹمنٹ میں میاں بیوی رہنے کا ارادہ رکھتے ہیں وہ مناسب طور پر کشادہ ہے۔

جو میاں بیوی جرمنی میں شفٹ ہونا چاہتے ہیں انہیں دوسری ضروری شرا‎ئط کا پورا کرنا بھی لازمی ہے۔ مثال کے طور پر انہیں شناختی ثبوت فراہم کرنا ضروری ہے۔ یہ پیدائش کا سرٹیفیکیٹ ہوسکتا ہے جس سے یہ پتہ چلے کہ وہ وہی شخص ہے جس کا وہ دعوی کررہا ہے۔ ان کے پاس پاسپورٹ یا منظور شدہ بدل پاسپورٹ کا ہونا لازمی ہے۔ جو میاں یا بیوی اپنے شریک حیات سے جرمنی میں ملنے کے خواہش مند ہوں ان کے لئے ضروری ہے کہ سادہ جرمن زبان میں گفتگو کرسکتے ہوں اور اس کو ثابت کرنے کے لئے ان کے پاس زبان سیکھنے سے متعلق سرٹیفیکیٹ بھی ہونا چاہئے۔

یہ قوانین ان جوڑوں پر لاگو ہوں گے جن میں کوئی بھی شریک جرمنی یا یورپین یونین کی شہریت نہ رکھتا ہو۔ اگر کوئی بھی شریک جرمنی کا باشندہ ہے تو شرائط کم سخت ہوں گی۔ اس صورت میں عام طور سے جوڑے کو یہ ثابت نہیں کرنا پڑے گا کہ ان کے پاس روزمرہ کے اخراجات کو برداشت کرنے کی صلاحیت ہے یا پھر یہ کہ ان کے پاس مناسب طور پر کشادہ اپارٹمنٹ ہے۔ اگر ان میں سے کوئی شریک یورپین یونین کا شہری ہے تو ان پر یورپین یونین میں آزادانہ نقل و حرکت سے متعلق قانون لاگو ہوگا۔ 

اگر کوئی شریک حیات جرمنی میں بطور پناہ گزیں یا تحفظ کے مستفید کی حیثیت سے رہ رہا ہے اور اس کے قضیہ میں حتمی فیصلہ بھی لیا جا چکا ہے، اس صورت میں اہل خانہ کے اتحاد نو سے متعلق دوسری شرائط لاگو ہوں گی۔ اس کا انحصار، دوسری چیزوں کے علاوہ، اس پر ہوگا کہ اس شخص کی پناہ گزیں حیثیت کیا ہے اور مزید یہ کہ کیا درخواست صحیح وقت پر داخل کردی گئی تھی یا نہيں۔

پناہ گزینوں کے اہل خانہ کے اتحاد نو سے متعلق معلومات کا ایک عمومی جائزہ نیچے دی گئی لنک میں موجود ہے rumoursaboutgermany.info/rumours/do-all-refugees-in-germany-have-the-right-to-be-reunited-with-their-family-members.

پناہ گزینوں کے اہل خانہ کے اتحاد نو سے متعلق تفصیلی معلومات اس لنک میں موجود ہے fap.diplo.de۔

وفاقی جمہوریہ جرمنی کے سفارت خانوں اور قونصل خانوں کی ویب سائٹ پر بھی ویزے سے متعلق تفصیلی معلومات اور اہل کنبہ کے اتحاد نو سے متعلق ضروری شرائط کا ذکر موجود ہے۔

آخری بار اپڈیٹ کیا گیا: 2019-03-07 شائع کیا گیا: 2019-03-01